На 7-ми септември 2023, ден пред Денот на независноста – 8-ми септември, во Културно-информативниот центар на Северна Македонија во Софија се одржа промоцијата на бугарските изданија на книгите „Цариградски емигрант“ и „Граница“ од Луан Старова.
На првото постхумно претставување на делото да големиот македонски писател присуствуваа: Дита Старова-Ќерими, ќерка на Луан Старова и директор на Националната галерија на Северна Македонија, издавачот и литературен критичар Пламен Тотев, преведувачот и писател Маријан Петров и амбасадорката на Северна Македонија во Бугарија Н.Е. Агнеза Руси-Поповска.
Н. Е. Агнеза Руси-Поповска го истакна аманетот што го остави Луан Старова – за целосна европеизација на Западен Балкан. Тој во интервју за БНР пред три години изјави дека главната мисија на неговите романи е да најде заеднички јазик меѓу балканските народи.
Книжевниот критичар Пламен Тотев зборуваше за пријателството со Луан Старова, за почитта и шармот на неговиот интелект, за неговата богата култура и космополитизам. Ја спомена и неговата дипломатска кариера – како амбасадор во Франција, Шпанија, Португалија и УНЕСКО, неговата наставна, академска и преведувачка дејност.
Преведувачот Маријан Петров, кој преведе над 120 книги од словенски јазици, ги сподели своите впечатоци од книгите и прочита избрани извадоци од романите.
Долго време по завршувањето на официјалниот дел од настанот, Дита Старова-Ќерими даваше автограми на книгите на нејзиниот татко.
Настанот го проследи публика составена од пријатели на македонскиот КИЦ во Софија, претставници на дипломатскиот кор, писатели, преведувачи, уметници и љубители на литературата.
