На 2 декември 2021 во КИЦ на РСМ во Софија се одржа „Литературна вечер со писателката и преведувачката Ана Багрјана“.
За богатата преведувачка дејност на Ана Багрјана, во која се застапени повеќе наслови од македонски автори, преведени на украински јазик, како и за нејзината писателска дејност говореа директорот на македонскиот КИЦ во Софија д-р Сашко Насев и литературниот критичар и книгоиздател Пламен Тотев. Режисерот и актер Ѓорги Георгиев – Антика читаше избрани кратки текстови и поезија.
Настанот почна со едноминутно молчење за загинатите стари лица во селото Ројак во Бугарија и за 45-те македонски државјани кои загинаа на 23 ноември во сообраќајна несреќа на автопатот „Струма“. Директорот на Културно-информативниот центар на Република Северна Македонија во Софија Сашко Насев се заблагодари за букетите, електронската пошта и сочувството што граѓаните на Бугарија го изразија во КИЦ по повод несреќата минатата недела.
На културната вечер присуствуваа голем број дејци и претставници на културниот живот на Софија, а на присутните им се обратија и писателот и поранешен директор на бугарскиот КИЦ во Скопје Димитар Христов, како и амбасадорот на Украина во Бугарија Виталиј Москаленко, поранешен украински амбасадор во Северна Македонија.
На литературната вечер присуствуваа само оние кои претходно се пријавиле и имаа потврди за вакцинација или за прележеност од Ковид-19. Поставените услови се со цел почитување на мерките за справување со пандемијата.
